وصف مادر از جمال و کمال اَشبَهِ پیغمبر ، حضرت علی اکبر (ع)
سنی خلق ایلیَن الله یارادان وقتدَه سنی
گوشۀ قدرتینی ایستیوب ائتسون عَلَنی
غرقِ حیرت ائلیَر صورتون ، هر بیر گورَنی
کیم باخا صورتووَه ، شُکر ائلیَر خلق ائدَنه
بللّیدور سجده ائدَر بیر بئلَه نعمت وئرَنَه
ذات حَق خَلق ائلیوب خلقته اعجاز سنی
یارادوبدور بلی شایسته و ممتاز سنی
ائلیوب نُه فلکه رمز سنی ، راز سنی
یِر ، گؤیی جَدّووَه خاطر حقِ داور یارادوب
خلق و خُلقوندَه سنی جدّووَه بنزَر یارادوب
گوزووَه کیم باخا سؤیلَر که پیمبر گوزودی
سوزلرون آیه قرآندی ، رسولون سوزودی
سنی کیم گورسه دیَر شخص پیمبر اوزودی
جدّوُون بنزَریسن گوزگوده باخسون اوزووَه
ننه قربان بالا پیغمبره بنزَر گوزووَه
اَلِف قامتوه کیم باخا حیرتده قالار
صورت ماهون اوغول ماهلری شرمه سالار
قاشلارون تیغ مثالینده دی چوخ جانلار آلار
کیپریگون اوخدی ، لبون لعلیدی ، لعل یمنی
یارادوبدور یارادان فوق گوزللیکده سنی
ای منیم عمرومه سرمایه علی ، گئتمه دایان
یارادور گئتمگون اوغلوم ، آنووا چوخ هیجان
گَلمَسون گَر بو سفردَن سؤزومه اوغلوم اینان
دَلی اولاّم دوشَرَم چوللَرَه مجنون مَثَلی
هر گؤرَن سَسلیَر اوندا بودی لیلایِ علی
آرزومندیدی لیلا سنه بیر گون طوی ائدَر
یثربون کوچه لَرین تازه عروسیلَه گَزر
کیم گؤرَر اوندا منی حسرتیلَن بِیلَه دیَر
یول وئرون ، بو گَلَن اَکبر آناسی لیلادی
بونون اوغلی بوتون اَقوام آرا بی همتادی
چاتماسام آرزیما اکبر دلی اولسام یری وار
ائل، قوهوم ایچره دیَلَّر که اولوب درده دُچار
گؤزی آهو ، سنی گَر تیرِ قضا ائتسَه شِکار
مَلَرَم هَر نَه قَدَر عُمروم اولا وای دیَرَم
گئجه لَر یاتمارام اوندا ، بالا لای لای دیَرَم
اولموشیدی آدون اکبر باشیمون تاجی منیم
اولسا پَرپَر گُلِ عُمرون سولاجاقدور چمنیم
آرتاجاق گون بَه گون اندوه و مَلال و محَنیم
قال دویونجا اُپَه لیلا او گوزَل صورتوی
یِری؛قوی گورسون آنون سرو کیمین قامتوی
مُلْتَمِسِ دُعا
واویلا، واویلا، شب قتل حسین است (2)